Vorm olde Kino

Isch laaf om Owend dorsch die Stodt,
Betrocht ihr Haiser, Gasse
Unn gugg, wos sisch verännert hot
Unn wos mer hot gelosse.
Beim Kino bleib isch länger steihn.
Des olde Borschtheader,
Viel hunnerd Mol hot’s misch geseihn,
Unn monschmol hot de Vadder
Geschennt wie’n Rohrspatz unn gesocht:
Die Kerle soin wie deiwisch!
A die trooche jeden Pennisch hie,
Mer meischt se leische iwwers Knie,
Sell des so soin fer ewisch?

Unn donn wor’s gonz schnell aus.
Die Zuschauer soin fortgebliewe,
Des Fernsehn hot de Film vertriewe,
Es Kino konnt sisch nit mehr holde
Unn mußt zum Deersche naus.
E Gschäft is jetzt noikumme,
Schee renoviert, foi imgebaut,
Noo, noo, des muß mer sooche laut,
Die Neie soin ko Dumme!
Doch heit om Owend bleib isch steihn,
Loß moi Gedonke rickwärts geihn,
Seih alles, wie’s mol wor:

Die Sondstootrebbe, schee gemauert,
Die Bilderkäste on de Wenn,
De große Boom devor.
De Mormorbode vor de Kasse,
Die Kasse rechds, die Drobbsjen links,
Dezwische neie Filmplakade
Von Filmschen, die scho uff oon warde,
Oh, hett mer doch defier scho Karde!
Unn donn es Allerheilischste, de grouße Kinosaal,
Mit Losche, Sperrsitz unn Parkett,
Rasiersitz, kloer, die worn fer uns,
Des longt sou, allemol.
Die Wenn, all iwwersponnt
Mit roudem Kunststofflädder,
Roud eleschont aa de long Vorhong,
Joo, des wor scho e gudi Stuwwe,
Wou’s doch bei jedem Wedder
Schee wor.

Unn denkt’s Eisch noch, on Woihnochde,
De riesischgrouße Boom
Mit denne viele, viele Kerze?
Des hot gewärmt die Besucherherze,
Wor scheener als dehoom.
Des alles, Leit, fällt mer jetzt oi,
Wonn isch devor sou steih.
Unn wonn isch selbst aa heit noch
Efders ins Kino geih,
Muß isch doch ehrlisch sooche:
Im olde Borschtheader do,
Ob mit Freunde odder aa elloo,
´s worn schennre Kinodooche.

Hans Meserle